Nagsugod na sa pagboto ang mga Amerikano para sa masunod nga presidente nga magapungko sa White House.
Kinahanglan nanday Vice President Kamala Harris sang Democrats kag former President Donald Trump sang Republicans ang at least 270 electoral votes para nga magdaog sa sini nga eleksyon.
Ang battleground states sang Arizona, Georgia, Michigan, Nevada, North Carolina, Pennsylvania kag Wisconsin amo ang ginalantaw nga mangin lyabe para matumod kun sin-o sa tunga sang duha ka mga kandidato ang magapangibabaw subong nga tuig.
As of 6 a.m. Eastern Time, ang polling locations nga nagbukas ang nagalakip sa Connecticut, New Jersey, New York, New Hampshire, Virginia, Indiana, Kentucky, kag Maine.
Sang 7 a.m. ET, nadugangan ang nagbukas nga polling centers nga amo ang Alabama, Delaware, Washington DC, Florida, Georgia, Illinois, Kansas, Maryland, Massachusetts, Michigan, Missouri, Pennsylvania, Rhode Island, South Carolina, kag Tennessee.
Sang 8 a.m. ET, nagbukas man ang centers sa Arizona, Iowa, Louisiana, Minnesota, South Dakota, North Dakota, Oklahoma, kag Wisconsin.
Antes sini, ginhiwat sang duha ka presidential candidates ang ila final campaign events sa battleground states sang nagligad nga gab-i.
Gintakpan ni Harris ang iya 107-day campaign sa Pennsylvania samtang sa Michigan naman nagtapos si Trump nga amo man ang state nga iya ginpili nga pinal nga kadtuan sa nagligad nga duha sini ka presidential campaigns.
Magpadayon sa pagbantay sa US election updates sa Bombo Radyo Philippines nga dal-on sang masobra 150 ka Bombo International correspondents direkta halin sa nagkalain-lain nga states sa Estados Unidos sang Amerika.
