Naghalad sang pangamuyo ang isa ka gamay nga lugar sa India nga ginhalinan sang pamilya ni Vice President Kamala Harris para sa kadalag-an sang Democrat candidate sa US presidential elections.
Diri sa Thulasendrapuram sa state sang Tamil Nadu nagapuyo ang Lolo ni Harris nga si P.V. Gopalan antes ini nag-migrate sa state sang Chennai. Sang tion nga nag-retiro ini, isa ini ka high-ranking government official.
Lakip sa ginhimo sa temple ceremony amo ang ritwal, pagbagting sang lingganay, kag paghalad sang mga bulak bilang pangabay nga paboran si Harris sa sini nga piniliay.
Sa tempo, may nakaukit man nga pangalan sang Democrat sa bato kag may lista man sang public donations.
Gintawag sang local officials si Harris nga “the daughter of the land”.
Ini man nga lugar ang nakilala apat ka tuig na ang nagligad sang nagpangamuyo man ang mga residente para sa kadalag-an sang Democratic Party sang nagpadalagan si Harris bilang bise-presidente. Ginselebrar man nila ang kadalag-an sini paagi sa pagpalupok sang firecrackers kag pagpanagtag sang mga pagkaon.
Nahibaluan nga Indian ang iloy ni Harris kag Jamaican naman ang iya amay. Siya ang una nga woman vice president sang US, una nga African-American vice president, kag una man nga Asian-American vice president.
