Nasapwan ang isa na naman ka fetus sa distrito gihapon sang Molo sa syudad sang Iloilo.
Ginabanta nga naga-edad ini sang duha tubtub tatlo ka bulan, may na-develop na nga kamot kag amat-amat nga naga-porma ang ulo, kag preska pa sang nakit-an sang mga residente nga nagalabay sa eskinita sa Zone 3, North Baluarte, Molo, Iloilo City pasado alas otso kagab-i.
Base sa istorya ni Ome nga isa sa mga residente, sang naagyan niya ini kagab-i, wala man niya ginsapak kag ginlikaw lang ang iya dala nga tricycle bangud ginpinsar nga iya ini sang ido.
Sa interview naman sang Bombo Radyo kay Punong Barangay Allan Aurelio, iya ginpahayag nga may kabataan pa nga nakasipa-sipa sini antes ginsuspetsahan nga iya ini sang tawo.
Ginsindihan naman sang kandila ang lugar kun sa diin nakit-an ang fetus kag ang nagalapta nga dugo.
Sa interview naman sang Bombo Radyo kay Lenory Enriquez, social welfare officer I, iya ginpahayag nga indi subong matumod kun hungod nga ginbilin sang iloy ang fetus ukon basi kun nahulugan ini samtang nagalakat.
Iga-check man ang closed circuit television agud nga malantaw kun sin-o nga mga babaye ang nakalabay sa lugar antes nasapwan ang fetus.
Sang nagligad nga adlaw, matandaan nga may nasapwan man nga fully-developed nga lapsag nga nagalutaw sa punong sang Brgy. South San Jose, Molo, Iloilo City.
Indi pa subong matumod kun sin-o ang iloy sang baby girl apang base sa City Social Welfare and Development – Molo District, kumpirmado nga indi sa South San Jose naghalin ang bata bangud wala sang narekord nga residente nga nagabusong sa lugar.
