Ano bala kalawig ang date kun bag-o lang kamo nagkitaay sang isa ka tawo nga posible mo maka-relasyon?
Para sa isa ka babaye sa Auburn, Alabama, USA, gina-uyatan niya ang record sang “shortest first date — ever!”
Gin-istorya ni Maggie Smith, 32, nga may yara siya sang nakilala nga lalaki sa isa ka dating app tubtub nga nag-sugtanay sila nga magkitaay sang personal.
Sa guwa sang isa ka restaurant, nagtabuay si Maggie kag ang iya ka-date, ginkup-an pa siya sini, kag ginpamangkot kun nagutom na siya.
Ginhagad siya sini nga magsulod sa restaurant para magkaon, kag nauna pa gani si Maggie sa paglakat kag sa iya naman likod ang lalaki.
Wala pa gani sila nakapungko, ginpapundo siya anay sang lalaki kag naghingyo kun pwede sila maka-istoryahanay.
Sang nakaguwa na sila sa restaurant, nagprangka ang lalaki kag nagsiling, “I’m sorry. I’m just not feeling it.”
Na-shock ang babaye kag basta-basta na lang nga naglakat ang lalaki kag nagmato-mato na man lang drive pauli si Maggie.
Indi sini mahangpan kun ano ang rason kun nga 45 seconds lang gid ang kalawigon sang iya first date.
Pahayag pa sini, todo-make up pa siya antes naglakat.
Suspetsa pa sini, matuod nga daku ang iya lawas apang wala man niya ini ginatago sa dating profiles bangud may pictures siya nga yara ang tanan nga angle kag wala man sang filters.
Nagapati man siya nga indi weight factor ang rason bangud sa gab-i antes ang ila date, nagsiling pa ang lalaki nga nagaka-impress gid siya sa personality, intelligence, kag drive ni Maggie.
Sigurado man ini nga wala siya naghimo sang catfishing ukon ang paghimo sang fake online identity para makapanunto kaangay sang pagkawat sang personal information para makatindog bilang fake persona.
Positibo ang reactions kag madamo ang nag-encourage kay Maggie nga indi madulaan sang self-confidence matapos nga gin-share sini online ang iya eksperyensya.
Ginsiling man sini nga wala siya nadulaan sang kumpyansa sa kaugalingon bangud may duha siya ka trabaho, padayon ang pag-upod sa iya mga abyan, kag masami nagalantaw sang soccer games.
Labi sa tanan, open siya gihapon makipag-date, apang subong, gin-delete sini anay ang dating app sa iya smartphone bangud nagapati siya nga indi pa ini maayo subong sa iya nga mental health.
