Gin-veto sang Estados Unidos sang Amerika ang resolution sa United Nations Security Council nga nagaduso sang ceasefire sa giyera sang Israel sa Gaza.
Lakip sa ginpanawagan kuntani sang tikang sa 15-member council amo ang “immediate, unconditional and permanent ceasefire” kag separado nga nag-demand para sa paghilway sang iban pa nga mga bihag.
Isahanon lamang ang US nga nag-veto apang bangud isa ini ka permanent council member, bastante na ini nga tikang agud mabalabagan ukon indi mapasar ang resolution.
Suno kay Robert Wood, deputy U.S. ambassador to the U.N., suportahan lamang nila ang resolution nga maathag nga nagasaad nga nagapanawagan ini sang gilayon nga pagpaguwa sang mga bihag bilang parte sang ceasefire.
Ini na ang ikaapat nga tion nga gin-veto sang Biden administration ang resolution nga nagapanawagan nga tapuson ang kumplikto sa Gaza.
Gilayon naman nga gin-ulan sang kritisismo ang US bangud sa pag-block sa resolution nga ginhimo sang 10 ka elected members sang council nga amo ang Algeria, Ecuador, Guyana, Japan, Malta, Mozambique, South Korea, Sierra Leone, Slovenia kag Switzerland.
13 ka bulan na ang ginlawig sang giyera sang Israel sa Gaza kun sa diin 44,000 na ka mga tawo ang napatay kag halos bilog nga populasyon ang nadulaan sang puluy-an.
Ginlunsar nila ang giyera bilang pagtimalos sa Hamas fighters nga nagsalakay sa southern Israel sang Oktubre 7, 2023, nagpatay sang 1,200 ka mga tawo, kag nagdala sang masobra 250 ka hostages sa teritoryo sang Palestine.
