Nagpaandam ang Cybercrime Investigation and Coordinating Center (CICC) sa publiko kaangot sa ginalantaw sini nga pagtimbuok sang kaso sang investment scams sa pungsod nakabaton ang opisina sang 14 complaints sang cryptocurrency kag dollar scams umpisa sang nagligad nga semana.
Suno kay CICC executive director Alexander Ramos, may yara sang ginalantaw nga pagsaka sang investment scams sa tunga sang pagpanglakaak sang cryptocurrency sa global market.
Ang mga biktima sini nga scam ang ginahingyo nga mag-invest sang $100 to $1,000 nga iga-deposit nila sa foreign account.
Apang pagkasunod sini, utdon na sang scammers ang ila komunikasyon kun masiguro na nila nga ma-deposit na sang biktima ang kuwarta sa ginhatag sini nga account.
Gindugang man sang CICC nga masami nga foreigners ang scammers nga magapromisa sang maayo nga resulta sang investments sa cryptocurrency kag magapakuno-kuno man nga may yara sang urgency ukon ginadalian gid rason nga magapati-pati man gilayon ang mga biktima nga inosente kaayo. Suno pa sa CICC, masami nga gina-claim sang scammers nga limitado lamang ang ila offer kag kun indi ini pagtukubon sang biktima, mawad-an ini sang isa ka daku nga oportunidad.
Nahibaluan nga base sa impormasyon sa Forbes.com, ang price sang bitcoin ang nagsaka sa $91,488 as of Nov. 19 halin sa $500 sang May 2016.
Todo-panugyan naman ang CICC sa publiko nga magtuon gid sa tanan nga porma sang investment antes magpasaga-saga nga ibutang ang kuwarta para diri.
Ang warning sang CICC ang kadungan man sa video message sang United States-based Federal Trade Commission (FTC) nga nagaalerto sa publiko kaangot sa pagdamo sang investment scams sa Pilipinas. Sa amo nga video, ginhingyo ang mga biktima nga mag-report sa CICC kag iban pa nga law enforcement agencies.#
