Ginpasaka kag ginpabaskog sang Presidential Security Command (PSC) ang mga lihok sini para sa seguridad ni President Ferdinand Marcos Jr. kag sang iya pamilya matapos ang latest statement ni Vice President Sara Duterte nga naangot sa posible nga asasinasyon.
Suno sa PSC, ang ila nga adjustments ang kasunod sang direktiba halin kay Executive Secretary Lucas Bersamin.
Ginsiling sang opisina nga gina-seryoso nila ang anuman nga pamahog sa kabuhi sang presidente kag sang iya pamilya bisan kay sin-o pa ini naghalin kag ilabi na kun ginhimo ang pamahog sa atubang sang madamo nga tawo. Ginakonsiderar man ini suno sa opisina nga isyu sang national security kag dapat nga may mga lihok sila nga himuon para sa safety sang pinakamataas nga opisyal sang pungsod.
“Any threat to the life of the President and the First Family, regardless of its origin—and especially one made so brazenly in public—is treated with the utmost seriousness,” kabahin sang statement. ““We consider this a matter of national security and shall take all necessary measures to ensure the President’s safety.”
Kun balikan, Sabado sang aga sang nagbuga sang iya kaakig si Duterte kag ginpautwas ini tanan paagi sa Zoom press conference matapos ginmandu sang Kamara nga isaylo ang iya chief of staff nga si Atty. Zuleika Lopez sa Women’s Correctional Facility sa Mandaluyong City.
Pila ka beses nga ginbuyayaw ni Sara sanday President Marcos, First Lady Liza Marcos, si House Speaker Martin Romualdez, kag ang mga tawo sa Kamara.
May isa ka bahin sang press conference nga ginsiling sini nga kun mapatay siya, nagmandu man ini sa ka tawo nga patyon man sanday President Marcos, ang first lady, kag ang house speaker.
Ginklaro pa sini nga wala siya nagalahog sa iya nga order.
Kasunod sini, sa interview sang Bombo Radyo, ginklaro ni Sara nga antes pa man niya ginsugid sa publiko ang kill order, may nabaton na siya nga “threat” sa iya kabuhi. Ginpaathag man sini nga ginplastar lang ini ang sitwasyon PANANGLITAN ipapatay gid man siya.
Ginpaanggid man ni Sara ang iya statement sa iya nauna nga ginbuy-an nga deklarasyon nga PANANGLITAN magsige ang mga pagpang-atake sang Marcos Jr. administration batok sa iya, ipakalkal niya ang bangkay ni former president Ferdinand Marcos Sr. sa Libingan ng mga Bayani kag itagbong sa West Philippine Sea.
Wala pa sang personal nga statement nga gin-isyu ang presidente kaangot sa sini nga “kill order.”
