Ginsikway ni anay Presidential Spokesperson Atty. Salvador Panelo ang alegasyon ni former Presidential Spokesperson Harry Roque nga political persecution ang gina-atubang niya may kaangtanan sa iya asylum application sa Austria.
Ginpanawagan man ni Panelo kay Roque nga magbalik na sa Pilipinas kag atubangon ang mga kaso nga ginpasaka batok sa iya.
Suno kay Panelo, ang pila sa mga ebidensya nga gin-gamit bilang basehan sang mga panumbungon batok kay Roque ang naghalin mismo sa iya mga pahayag sa Kongreso.
“Kasi nanggaling sa bibig niya nung sa Congress ‘yung mga ebidensya na naging daan para i-demanda siya. Number two, sabi ko nga, harapin mo ‘yung mga kaso mo. Bumalik ka, maging lalaki ka,” suno kay Panelo.
Dugang niya, depensahan pa niya si Roque kun yara siya sa husto; apang kun mapamatud-an nga yara ini sa sala, dapat ini mag-atubang sa kunsekwensya.
“If he is in the right, I will defend him. But if he is in the wrong, good luck to him, I’ll visit him in jail,” dugang ni Panelo.
Nahibaluan nga ginkasuhan si Roque kaangot sa ginaalegar nga kaangtanan sini sa illegal Philippine Offshore Gaming Operations (POGO) hub operations, apang antes pa man pormal nga na-file ang charges, nakaguwa na siya sa Pilipinas.
Sini lang nga semana, ginsapubliko ni Interior Secretary Jonvic Remulla nga na-deny ang asylum bid ni Roque sa Austria apang gintawag ini sang former Palace official nga “fake news.”
Sa bahin sang Department of Foreign Affairs (DFA), wala pa ini sang nabaton nga official notification kaangot sa status sang aplikasyon ni Roque para sa asylum sa amo nga pungsod sa Europa.#
