Gin-athag ni Vice President Sara Duterte nga naglab-ot na sa punto nga indi na gid sila mag-uliay ni President Ferdinand Marcos Jr. kasunod sang nagasaka pa nga tensyon sa ila kag sa pulitika diri sa Pilipinas subong nga mga sinemana.
Sa tinaga sang bise-presidente, nalab-ot na nila ang “point of no return.”
“I believe we reached the point of no return and it is clear na [that] they are really going after me,” pahayag sini.
Sa utod-utod nga press conference sa Zamboanga City nga naka-live man sa social media page sang vice president, ginsiling sini nga nagapati siya nga ginalagas gid siya sang Marcos administration kag gusto gid siya nga ipakakas sa pwesto.
“Well, I believe that we reached the point of no return. I really believe that we have reached the point of no return. It is clear parang (like) they are really going after me. At gusto nila akong tanggalin sa posisyon,” suno kay Sara.
Running-mates sanday Marcos kag Sara sang 2022 sa idalom sang UniTeam apang amat-amat nga nagtunga ang ila banas tubtub nga nag-resign si Sara sa Gabinete bilang tiglikom sang Department of Education (DepEd).
Naglala ang away tubtub sang nagligad nga semana, nag-ako na si Sara nga may ginmanduan siya nga KUN may magpatay sa iya, patyon man si Marcos, ang house speaker, kag ang house speaker.
Ginpahayag man sini nga matuod gid ang mga pamahog sa iya, sa iya personnel, kag sa iya nga pamilya.
Wala sini maathag nga ginmensyonar kun kay sin-o naghalin ang iya ginaalegar nga mga pamahog, apang ginsugpon sini si House Speaker Martin Romualdez.
Pahayag ni Sara, gusto gid ni Romualdez nga mangin vice president apang wala ini nakahibalo nga indi gusto sang Kongreso nga siya ang magapungko sa posisyon.
Indi man gusto sang mga Pilipino nga mangin presidente ini suno kay Sara, apang suno sa iya, indi ini gihapon mahangpan ni Romualdez tubtub subong.
Una na nga nagsabat ang house speaker nga ginahungod ni Sara ini nga mga pahayag agud maliso ang atensyon sang publiko kag malipatan ang isyu sa confidential funds sang Office of the Vice President kag DepEd.#
