Nakuha sang West Visayas State University (WVSU) La Paz ang 100% nga passing rate sa bag-o lang ginpaguwa nga resulta sang November 2024 Philippine Nurses Licensure Examination (PNLE).
Suno sa Professional Regulation Commission (PRC), 108 sa mga estudyante sa WVSU ang nagkuha sang pasinawan kag lunsay nakapasar nga nagbutang sa unibersidad sa Rank 1 sa Top Performing Schools kaupod sa 10 ka iban pa nga buluthuan.
Apat man ka mga estudyante sang WVSU College of Nursing- Batch Zephyr ang nakasulod sa lista sang topnotchers.
Rank 8 si Ma. Irish Himan Silvestre nga may 91% nga rating samtang Rank 9 naman sanday Robert Mathew Manzon Opong kag Karen Joy Sobusa Oscares nga pareho nga may 90.80% nga rating.
Sa pihak nga bahin, Rank 10 naman si Richard Olano, Jr. nga may 90.60% nga rating sa pasinawan.
Suno sa PRC, kabug-usan nga 34,534 ang nagkuha sang exam sini nga Nobyembre kag sa sini nga numero, 29,349 ang nakapasar ukon katumbas sang 84.99%.
Ginpatigayon ang November 2024 PNLE sang November 9 to 10 sa nanuhay-tuhay nga testing sites sa bilog nga pungsod.#
(Pictures: Screenshots from The Lifeline)
