Padayon nga naganubo ang fertility rate sa Western Visayas.
Sa interview sang Bombo Radyo kay Harold Alfred Marshall, director sang Commission on Population and Development Western Visayas, iya ginpahayag nga sa subong, yara sa 2.1 percent ang fertility rate sa rehiyon.
Suno kay Marshall, ang pagnubo sa fertility rate ang patimaan nga ang mga babaye sa rehiyon ang may tingog na sa numero sang mga kabataan nga luyag nila mabun-ag pinaagi sa family planning.
Ginpahayag sini nga ang manubo nga fertility rate ang isa sa mga kondisyon agud maangkon ang demographic dividend ukon ang potential economic growth.
Nagwa sa data halin sa National Demographic and Health Survey nga ang total fertility rate sa mga Pinay nga naga-edad sang 15 tubtob 49 ang nagnubo sa 1.9 percent sang 2022 halin sa 2.7 percent sang 2017.
Samtang, nagataas naman ang numero sang adolescent pregnancy, partikular sa mga babaye nga naga-edad sang 19 anyos panubo.
Pila man sa mga issue sa adolescent pregnancy amo ang gadgets, peer pressure kag kakulang sa paggiya.
Nagalaom man si Marshall nga mahatagan ini sang nagakaigo nga atensyon agud indi masulit ang ila pagbusong sa lamharon nga edad.
Ini ang ginalauman nga matuman sa bulig man sang nagkalain-lain nga ahensya kaangay sang Department of Health, Department of Social Welfare and Development, Department of Education kag mangin sang local government units.
