Na-eleher liwat si Abraham “Bambol” Tolentino bilang presidente sang Philippine Olympic Committee (POC).
Magapabilin ini sa posisyon sa masunod nga apat ka tuig matapos nakuha ang 45 ka mga boto sa POC elections batok sa 15 nga nakuha naman sang iya kasumpong nga amo ang baseball chief nga si Chito Loyzaga.
Antes ang eleksyon, ginpadayaw ni Tolentino ang mga kadalag-an sang Pinoy athletes sa idalom sang iya termino.
Lakip diri ang maragtason nga gold medal nga nakuha ni Hidilyn Diaz sa weightlifting sa Tokyo 2020 kag ang duha ka bulawan nga medalya nga nakuha naman ni Carlos Yulo sa gymnastics sa Paris Summer Games sini lang nga 2024.
Ikatatlo na ini nga termino ni Tolentino bilang chief sang Olympic body sang Pilipinas matapos una nga nagpungko sang 2019 sang nagbulos siya sa wala natapos nga termino ni Ricky Vargas paagi sa special election kag sunod nga nagdaog sa regular elections sang 2021.
Sa mga nagboto sa eleksyon sang Olympic Committee, kadam-an ang halin sa national sports associations, may duha nga halin sa Athletes Commission, kag isa halin sa International Olympic Committee.
