Ginhingadlan sang host-actress nga si Anne Curtis kun sin-o ang celebrities nga gusto sini nga mahimuan man sang wax figures sang prestihiyoso nga Madame Tussauds.
Si Anne ang pang-lima nga Pinoy nga nahimuan sang amo kabantog nga statue kasunod kanday Manny Pacquiao, Pia Wurtzbach, Catriona Gray, kag Lea Salonga.
Yara sa Singapore branch ang ginhimo para kay Lea nga ginsapubliko subong nga tuig samtang yara naman sa Hong Kong ang iya sang iban kag kay Anne.
Kun si Anne ang pamangkuton, gusto sini nga makaangkon sang wax figure si Sarah Geronimo nga pareho man sa suhestyon sang Filipino Broadway icon nga si Lea sang siya ang ginpamangkot.
Ginmensyonar man ni Anne ang isa pa ka veteran singer nga si Regine Velasquez kag ang iya abyan nga host nga si Vice Ganda bangud para sa iya isa ini ka amazing representation sang LGBTQIA community.
Kun sa aktor naman, pillion ni Anne si Coco Martin bangud siya ang “longest-running action star on television” kag si Kathryn Bernardo nga naangot man sa Hong Kong bangud sa iya blockbuster film nga “Hello, Love, Goodbye”.
Gin-mensyonar man ni Anne ang Nation’s Girl Group nga BINI kag ang two-time Olympic gold medalist nga si Carlos Yulo.
Sa separado nga interview, ginsiling sang Sales and Marketing head sang Madame Tussauds Hong Kong nga viable names sa masunod nga mga Pinoy nga himuan sang wax figures sanday Vice, Sarah, Regine, kag si Carlos.#
