Aksidente nga natiruhan sang anak ang iya iloy sa Sitio Lunok, Cubay, Jaro, Iloilo City.
Ang biktima amo si alyas Meryl, 59, kag ang bata nga nakatiro amo si alyas Darwin, 36, lunsay residente sang amo nga lugar.
Sa interview sang Bombo Radyo kay Police Major Eduardo Siacon Jr., hepe sang Police Station 9, iya ginpahayag nga antes ang insidente, nasugata ni Darwin ang mag-utod nga sanday alyas Elorde kag alyas Denard kun sa diin nagbaisay ang mga ini kag ginpahayag nga may daan nga hiligut-anon ang mga ini.
Suno kay Siacon, nagpauli si Darwin kag nagkuha sang armas kag sang nagbalik ini sa lugar kun sa diin yara ang mag-utod, nagsunod ang iloy sini.
Sang nagaatubangay na ang tatlo, gintuyo sang iloy nga magtambag kag punggan ang iya anak kag didto na naglupok ang pusil kag naigo ang biktima sa iya butkon kag paa.
Sa subong, padayon pa nga ginapangita sang mga kapulisan ang suspetsado kag wala marecover ang armas-luthang nga gingamit sini.
Nagapabilin naman sa ospital ang iya iloy para sa nagakaigo nga pagbulong.
