Padayon nga gina-ayam sang otoridad ang security guard nga suspek sa pagluthang-patay sa isa ka laborer sa Sitio Ilawod, Brgy. Poblacion, Barotac Viejo, Iloilo.
Ang biktima amo si Alyas Rodel, 36, residente sang Sitio Sambag, Brgy. Nueva Sevilla, Barotac Viejo.
Ang suspek naman amo si Alyas Tre-ar, 31, residente sang Sitio Ilawod, Brgy. Poblacion sa amo man nga banwa.
Sa interview sang Bombo Radyo kay Police Lieutenant Rene Aguinaga, Deputy Cop sang Barotac Viejo Municipal Police Station, iya ginpahayag nga nagapabilin nga ‘at large’ ang suspek apisar sang padayon nga pag-follow up sang talatapan sa mga kalapit nga banwa nga posible panaguan sang suspek.
Nagapanawagan naman si Aguinaga sa pamilya sang suspek nga kumbinsihon si Alyas Tre-ar nga magsungka na sa kapulisan kag atubangon ang iya nahimo nga kasal-anan.
Suno sa natungdan, dala sang suspek sa pagpalagyo ang pusil nga gingamit sini sa pagtiro sa biktima lakip na ang cellphone sang iya nga asawa.
Ginpahayag man sini nga santo sa imbestigasyon, nadakpan sang suspek ang iya asawa nga naga-chat sa biktima.
Bangud sini, gin-gamit sini ang cellphone sang iya asawa kag gin-chat niya ang lalaki agud pakadtuon sa ila nga balay.
Sang nag-abot ang biktima, ginsugata ini sang suspek kag gintiro sa tu-o nga bahin sang iya ulo gamit ang 12-gauge long barrel shotgun.
Gilayon nga gindala ang biktima sa Gov. Niel D. Tupas Sr. District Hospital apang gindeklarar nga dead on arrival.
