Ginbaton sang United States District Court – Central District of California ang guilty plea sang duha ka mga administrador sang religious group nga Kingdom of Jesus Christ (KOJC).
Base sa court documents, nagmandu na si Judge Terry J. Hatter Jr. sa pagpreparar sang pre-sentence report para kanday Amanda Estopare kag Guia Cabactulan.
Ang ila pag-plead sang guilty ang naangot sa Count 7 sang First Superseding Indictment nga amo ang visa fraud.
Ginkweston sang judge sanday Estopare kag Cabactulan kaangot sa plea agreement sa US District Attorney’s Office sang Oktubre, kag ginkumpirma sang duha nga boluntaryo sila nga nag-ako nga guilty kag pareho nga nahangpan ang terms sang agreement.
Bilang resulta, temporaryo sila nga ginhilway sang korte matapos nakapyansa. Dapat sila magsunod sa mga kondisyon sang korte sa tion sang pag-release sa ila.
Ang duha ka mga akusado ang napaidalom subong sa superbisyon sang probation office kag natalana nga sentensyahan sa Abril 21, 2025.
Base sa mga dokumento sa korte, umpisa sang 2015 tubtub sa Enero 2020, ang defendants kag iban pa ang may kasugtanan nga magkomiter sang marriage fraud.
Sila ang nag-arrange para sa mga miyembro sang KOJC — nga ginpadala ni Pastor Apollo Quiboloy sa Estados Unidos — para nga makasulod sa peke nga kasal sa iban pa nga KOJC members nga US citizens. Tuyo sini nga maka-apply sila para sa permanent resident status.
Matandaan nga una na nga nadakpan sang Federal Bureau of Investigation (FBI) sanday Cabactulan kag Marissa Duenas nga isa man ka KOJC administrator sa KOJC office sa Van Nuys, California, samtang si Estopare naman ang nadakpan sa Virginia sang 2020.
Ang US District Court for the Central District of California ang una naman nagbaton sang guilty plea ni Duenas. Natalana ang iya sentensya sa masunod man nga tuig.
