Naka-alerto ang Philippine Army kag ang Philippine National Police (PNP) kadungan sang founding anniversary sang Communist Party of the Philippines (CPP) subong nga adlaw, Disyembre 26.
Sa bahin sang militar, ginpahayag ni Army Spokesperson Col. Louie Dema-ala nga ginpahanumdom na sa tropa sa frontlines nga sige-sigehon ang internal security operations para nga mapabilin ang peace and order sa tagsa ka area of operation para nga mas malipayon kag malinong ang holidays.
Indi naman kinahanglan ang heightened alert suno sa iya bangud masami man sila nga naka-alerto.
Sa PNP, ginpahayag naman sang public information officer nga si Brig. Gen. Jean Fajardo nga ginmanduan ang commanders sa isolated police stations nga mas mapakuron ang ila nga depensa. Ginpasigurado man nga indi mabiktima ang kaupdanan nga mga pulis sa pagpang-harass kag pagpang-ambush.
Ginalantaw suno kay Fajardo nga magtimalos ang communist rebels ilabi na bangud sunod-sunod ang pagka-aresto sa NPA leaders.
Indi kaangay sa nagligad nga tinuig, wala nagdeklarar ang CPP kag ang gobyerno sang holiday ceasefire subong nga tuig.
Base sa record sang Armed Forces of the Philippines (AFP), as of December 2023, ang armed wing sang CPP nga New People’s Army ang ginabug-usan na lamang sang 1,500 fighters halin anay sa 25,000 nga ila ginapabugal sang 1987.
Ginestablisar ni Jose Maria Sison ang CPP sang December 26, 1968, samtang naporma naman ang NPA sang March 29, 1969 nga amo ang longest-running Maoist insurgency sa kalibutan.
Sang Disyembre 2022, napatay si Sison sa edad nga 83-anyos samtang naka-self exile sa Netherlands.
Sa subong, ang political wing naman sang CPP nga National Democratic Front of the Philippines ang naga-trabaho agud mag-resume ang peace talks sa gobyerno.
