Ginlunsar sang China ang bag-o nga amphibious assault ship nga sarang makapalupad sang fighter jets.
Natabo ang seremonya sa Hudong-Zhonghua shipyard sa Shanghai.
Ginatawag ini nga Sichuan nga amo ang pinakadaku subong nga combat ship sang Beiing. Gindesinyo ini para sa ground troops para sa combat kag agud nga makahatag sang air support sa ila nga tropa.
Suno sa state news agency nga Xinhua, nakabutang sa vessel nga ini ang electromagnetic catapult rason nga pwede makapalupad sang fighter jets halin sa deck sini. May yara man ini sang “arrestor technology” para nga makahugpa balik ang fighter jets sa deck.
Apisar nalunsar na, ipaidalom pa ini sa dugang nga testing kag sea trials antes paintrahon sa active service.
Nahibaluan nga todo-pangabudlay ang People’s Liberation Navy sang China nga mangin mas moderno ang ila pwersa-militar.
Sila ang largest navy sa kalibutan kun pagahambalan ang numero sang warships.
Ang ila pag-upgrade sang Sichuan ang natabo matapos natukiban sang researchers nga ginahikot man sang Beijing ang nuclear-powered aircraft carrier para nga ma-deploy ang ila nga mga barko sa mas malayo nga mga rehiyon nga wala na nagakinahanglan sang base agud nga maka-refuel.
Ang Estados Unidos ang may yara subong sang 11 ka aircraft carriers nga lunsay nuclear powered. Paagi sini, makapadala ang America sang strike teams sa bilog nga kalibutan sa tanan nga tion.
