Kun nagahatag gani sang donasyon, dapat nga santo ini sa aton nga kabubut-on, dapat nga wala ginapilit, kag dapat nga indi pakita-kita lamang.
Apang kun halimbawa, aksidente mo lang ini nga nahatag, may kinamatarong ayhan ikaw nga bawion?
Amo ini subong ang gina-debatehan sa India matapos aksidente nga nahulog sang isa ka lalaki ang iya malahalon nga cellphone sa sulod sang collection box sa templo.
Nagbisita ini nga lalaki sa Arulmigu Kandaswamy Temple sa Thiruporur kaupod ang iya pamilya agud nga magpangamuyo.
Naglusot sa iya bulsa ang cellphone kag nagtupa sa “hundial” nga amo ang metal donation box samtang nagahatag siya sang donasyon sa patron deity sang templo.
Sunod nga nagkadto ang lalaki sa mga opisyal sang templo kag naghingyo kun pwede nga mabalik sa iya ang cellphone bangud indi man ini donasyon.
Sa iya kakibot, nagpamalibad ang mga opisyal bangud may pagsulundan sila nga kun ano man ang mabutang sa donation box, iya na ini sang deity kag indi na pag-ibalik.
Suno pa sa Minister of Hindu Religious and Charitable Endowments, ang anuman nga halad sa deity — bisan nga boluntaryo man ukon aksidente — ang makabig na nga propiedad sang Diyos.
Nag-insister pa ang lalaki paagi sa pag-file sang complaint, apang sang ginbuksan ang donation box subong nga bulan, nangluya gid ang lalaki bangud wala gid nagpalingkang ang temple officials kag ginpanindugan gid ang ila desisyon.
Ang ila lang gintugutan amo nga makuha sang lalaki ang data halin sa iya cellphone.#
