Nagpasalig ang Association of Iloilo Provincial Government Employees nga ila tinguhaan subong nga 2025 nga mapataasan pa ang incentives nga mabaton sang mga empleyado.
Sa interview sang Bombo Radyo kay Airis Penetrante, Presidente sang nasambit nga asosasyon, iya ginpahayag nga nakit-an man niya kun ano ang ikasarang sang mga empleyado sang provincial government sang 2024 gani nagakadapat lang nga sa 2025 madugangan man ang ila benepisyo nga mabaton.
Ginakalipay gid sang natungdan nga antes ang pagsulod sang 2025, nahatag na ang tanan nga insentibo sang mga empleyado — regular man, contractual, job order ukon contract of service workers.
Matandaan man nga ginsiling ni Governor Arthur Defensor Jr. nga luyag sini nga magpartisipar ang tanan nga opisina sa mga pasidungog kag nagasalig mismo si Penetrante nga sa 2025 makuha sang mga opisina ang mga dapat dag-on sa bulig sang mga empleyado.
Dugang pa niya, nagapati sila sa asosasyon sang liderato ni Gov Defensor nga nakahibalo magtatap kag magbalikid sa ila nga mga empleyado.
