Balantayan na ang Opening Salvo sang Kasadyahan sa Kabanwahan subong nga Huwebes kag ang opening salvo sang Dinagyang Tribes Competition sa bwas, Biyernes.
Sa interview sang Bombo Radyo kay Joyce Clavecillas, Executive Director sang Iloilo Festivals Foundation, Incorporated, iya ginpahayag nga magasugod ang kahiwatan sa alas-tres sa hapon kun sa diin ang performance areas amo ang Freedom Grandstand kag Iloilo Provincial Capitol.
Suno kay Clavecillas, patilaw ini agud labi pa nga malangkag ang mga Ilonggo kag mga turista sa mangin highlights sang Dinagyang Festival sa Enero 25 kag 26.
Para sa Kasadyahan sa Kabanwahan, ang mga festivals nga magapasundayag amo ang Banaag Festival sang Anilao, Kaing Festival sang Leon, Tawili Festival sang San Rafael, Hirinugyaw Suguidadonay Festival sang Calinog, Tinuom Festival sang Cabatuan, Cry of Jelicuon Festival sang New Lucena, Tangyan Festival sang Igbaras, Haw-as Festival sang Dumangas, kag Tultugan Festival sang Maasin.
Para sa Dinagyang tribes naman, walo ka competing tribes ang magapasundayag nga ginabug-usan sang Tribu Paghidaet sang La Paz National High School, Tribu Salognon sang Jaro National High School, Tribu Parianon sang Distrito sang Molo, Tribu Ilonganon sang Jalandoni Memorial National High School, Tribu Pag-Asa Kang Manduryaw sang Distrito sang Mandurrriao, Tribu Hangaway sang Graciano Lopez Jaena Elementary School, Tribu Molave sang Brgy. San Rafael, Mandurriao, kag Tribu Pan-Ay sang Fort San Pedro National High School.
Maga-perform man ang anom ka barangay-based tribes para sa Sadsad sa Calle Real kag ang Tribu Sidlangan nga amo ang champion sa 2024 Ilomination.
Kaangot sa opening salvo, may patigayunon nga road closure sa pila ka parte sang City Proper particular na ang Calle Real.
