𝗜𝗟𝗢𝗜𝗟𝗢 – Gin-ako sang Department of Public Works and Highways (DPWH) Region 6 nga wala pa sang pondo para sa rectification sang Aganan flyover sa Barangay Aganan, Pavia, Iloilo.
Sa interview sang Bombo Radyo kay Engr. Sanny Boy Oropel, director sang DPWH Region 6, iya ginpahayag nga wala nalakip sa 2024 budget allocation ang pondo para sa rectification sang nasambit nga flyover.
Suno kay Oropel, may yara sila sang pondo para sa original design plan, apang ang jet grouting ang nagakinahanglan sang dugang nga resources.
Plano naman nila nga mag-request sang pondo sa Central Office agud matigayon ini.
Sa subong, ang P308 million sa P802-million nga total budget para sa Aganan flyover ang available sa gihapon agud matapos ini sa idalom sang approved design plan.
Apang kinahanglan pa sang ginabanta P210 million para sa rectification kaangay sang natabo sa Ungka flyover.
Nahibaluan nga ang Aganan kag Ungka flyovers ang parehas nga gin-desinyo sang United Technology Consolidated Partnership (UTCP) sa idalom sang Bureau of Design sang DPWH-Central Office.
Ginpasalig naman ni Oropel nga ginapadasig na sini ang ila plano kag pagpangita sang pondo agud malikawan ang pagkaguba sang Aganan flyover.
