Yara na sa 70% ang development sa pagsolbar sa kaso sang pagluthang-patay sa isa ka pastor nga natabo sa Barangay Anilao, Pavia, Iloilo sang Enero 10.
Ang biktima amo si Douglas Jover, 64, residente sang Quintin Salas, Jaro, Iloilo City kag nagatrabaho man bilang veterinarian.
Sa interview sang Bombo Radyo kay Police Lieutenant Gabriel Manguera, Deputy Chief of Police sang Pavia Municipal Police Station, iya ginpahayag nga may ginasundan na sila nga persons of interest apang ini pa nila mapangalanan ang mga ini.
Suno kay Manguera, may yara naman sila sang natumod nga motibo sa pagpatay sa biktima.
Ginpahayag man niya nga possible nga magkilalahay lang ang biktima kag ang suspek.
Base sa mga nakit-an nga ebidensya, posible nga indi anad sa pagpatay ang suspek bangud nga ginbilin lang sini sa sulod sang salakyan ang armas nga gin-gamit sa pagluthang sa pastor.
Naggwa naman sa dugang nga pagpangusisa sang kapulisan nga may problema sa kwarta ang biktima kag isa man ini sa ginasundan nga anggulo sang otoridad.
