Gintu-ad sang Barangay Anti-Drug Abuse Council sang Barangay Balabago, Jaro, Iloilo City nga wala sang malain nga record sa ila ang main subject sa buy-bust operation nga ginpatigayon sang City Drug Enforcement Unit (CDEU) kagab-i sa amo man nga lugar.
Ang mga subject amo sanday John Winston Porras, 30-anyos residente sang nasambit nga lugar; Jesus Angelo Martinez, 34-anyos, kag Berna Villarosa, 25-anyos residente sang Bolilao, Mandurriao, Iloilo City.
Ginakabig man ang tatlo nga HVI ukon High Value Individual.
Sa interview sang Bombo Radyo kay Punong Barangay Antonio Jacoba Jr., iya ginpahayag nga nalamhitan sang iligal nga druga ang pangalan ni Porras kasunod sang buy-bust operation sa banwa sang Leganes sang 2020 kaangot man sa paglapas sini sa Republic Act 9165 ukon Comprehensive Dangerous Drugs Act of 2002.
Suno kay Jacoba, anay nangin Sangguniang Kabataan Chairman man si Porras sa ila barangay.
Ginlaragway man sang natungdan nga wala nagaguwa sa balay si Porras kag masami nga indi makit-an sa ila komunidad.
Ginbuyagyag man sang natungdan nga bangud sa nagpangita sang palangabuhian ang iloy ni Porras sa luwas sang pungsod, tiya lang sini ang iya upod sa ila nga balay.
Nahibaluan nga nga ang buy-bust operation kagab-i ang nagresulta sa pagbaylohanay sang lupok sa tunga sang subject kag sa mga kapulisan bangud sa ginapahayag pagbato ni Porras sa kapulisan.
Nagdangat tanan sa P4,080,000 ang balor sang anum ka sachets kag 10 ka dalagko nga pinutos sang ginapasuni nga shabu nga ginabanta nagabug-at sang 600 grams ang nakuha kay Porras kag sa mga kaupdanan sini.
Magluwas diri, may yara pa sang caliber 45 nga pusil kag magazine nga may isa ka bala.
