Ginkakibot ni Iloilo City Lone District Representative Julienne “Jam-jam” Baronda nga ang Iloilo City Government ang mapatigayon sang programa sa opening sang Sunset Boulevard apisar nga proyekto ini sang Department of Public Works Region VI (DPWH-6).
Sa interview sang Bombo Radyo kay Rep. Baronda iya ginpahayag nga ginkatingala niya nga Iloilo City Government ang nagpreparar sang sulat nga ginpadala sa iya.
Suno kay Baronda, madumduman pa niya ang pagtinguha niya agud mapondohan ang Sunset Boulevard nga legasiya ni Former Senator Franklin Drilon antes paman ini nakapanaog sa pwesto.
Paathag niya, wala naman sang kaso para sa iya kun sin-o man ang mapatigayon sang ribbon cutting para sa nasambit nga proyekto bangud ang importante lang nga magamit na ini sang publiko.
Gintugyan nalang ni Baronda sa Department of Public Works and Highways ang pagpaathag sa pumuluyo nga naga-kwestyon kag natingala nga Iloilo City Government ang nagpatigayon sang pagtililipon para sa pagbukas sang nasambit nga proyekto.
Ginkumpirma man ni Baronda nga matambong ini sa opening ceremony sa Enero 24, 2025.
