Sobrahan pa sa nagdaog sa Miss Universe ang pamatyagan ni Iloilo City Lone District Rep. Julienne “JamJam” Baronda bangud sa iya kalipay sa bag-o nga posisyon ni former Iloilo City Mayor Jed Patrick Mabilog.
Si Mabilog ang nagpungko bilang Undersecretary for Public Safety sang Department of the Interior and Local Government (DILG).
Ginhiwat ang ceremonial oathtaking subong nga adlaw, Mayo 15, sa UP Visayas Auditorium nga gintambungan sang iya pamilya, mga abyan, mga taga-suporta, kag pila ka mga opisyal.
Sa speech ni Baronda, gintawag sini si Mabilog nga iya utod kag abyan.
Ginbalikan man sini ang record ni Mabilog bilang isa sa World’s Best Mayors, kag ang nangin daku nga kontribusyon sini sa pagpatahum kag pagpaayo sang Iloilo City.
“Sa matuod lang, subong nga adlaw, daw nagdaog ako sobra sa Miss Universe,” suno sa kongresista. “I have seen his faith, and today, because of his good work, gintagaan tyansa sang aton palangga nga presidente, PBBM, and Secretary Jonvic Remulla nga mangin Undersecretary sang DILG.”
Suno pa kay Baronda, bisan sang tion nga yara siya sa pinakamadulom nga parte sang iya karera sa pulitika, wala pa diri sa Iloilo City si Mabilog, apang sang ulihi, nagbalik ini sa tuyo nga makaalagad liwat sa mga Ilonggo.
Ini nga appointment kay Mabilog suno kay Baronda ang nagakahulugan nga wala nagapati ang mga Ilonggo sa mga patu-pato kay Mabilog sang una.
Mensahe pa sini, bisan ano kadamo sang inagyan ni Mabilog, wala gid nagbiya ang tagipusuon sini sa Iloilo City. Nagpasalig man ang kongresista nga indi niya pagbiyaan ang former mayor.
Matandaan nga sang 2024 sang nagbalik si Mabilog sa Pilipinas matapos nga gin-link anay ni former President Rodrigo Duterte sa iligal nga droga. Nakabaton si Mabilog sang executive clemency halin sa Malacañang sang 2025 — ang tuig kun sa diin gindakop naman si Duterte kag gindala sa The Hague.
