Patas na ang record sang Oklahoma City Thunder kag Cleveland Cavaliers nga may tag-34 ka daog kag anum ka kalutusan subong nga regular season sa National Basketball Association (NBA).
Ini matapos nakabalos ang Thunder sa pagpanguna ni Shai Gilgeous-Alexander, 134-114, sa latest game sa Paycom Center sa Oklahoma City.
40 points ang napaulan ni Gilgeous-Alexander nga amo ang pang-18 nga 40-point game sa iya karera. Magluwas diri, nakahimo man ang 26-anyos nga point guard sang eight assists kag three rebounds.
Nangin daku man nga bulig sa opensa si Luguentz Dort nga may yara man sang 22 points, kag si Jalen Williams nga nagdugang sang 19 points.
Sa pihak nga bahin, nagpanguna sa Cavs si Darius Garland nga may 20 points, samtang otso puntos lamang ang na-produce ni Donovan Mitchell.
Ang Oklahoma City ang nagapangibabaw subong sa Western Conference, samtang nagapanguna naman sa Eastern Conference ang Cleveland apang may yara sang identical records.
Antes sini nga hampang, ginlutos sang Cavs ang Thunder, 129-122, sang nagligad nga Huwebes sa Ohio.
Ginalantaw sang kadam-an nga basketball analysts nga ang duha ka nasambit nga teams ang maga-atubangay sa masandukot nga finals sa Hunyo.
