Umpisahan na sang Land Transportation Office Region 6 subong nga gab-i ang pagpangdakop sa mga drivers nga yara sa impluwensiya sang makahulubog nga ilimnon.
May kaangtanan ini sa pagsugod naman sang mga aktibidad sa Dinagyang festival.
Sa interview sang Bombo Radyo kay Atty. Gaudioso Geduspan, regional director sang Land Transportation Office Region 6, iya ginpahayag nga may yara sila sang gamiton nga apat ka breath analyzer agud matumod kun ang isa ka driver ang nakainom sang alcohol ukon wala.
Kun magpositibo sa alcohol ang driver, pasakaan ini sang panumbungon nga paglapas sa Republic Act 10586 ukon ang Anti-Drunk and Drugged Driving Law.
Sa tion naman nga ang hubog nga driver ang magtuga sang injury sa iban nga tawo, dagdagan ini sang penalidad nga P100,000 tubtob P200,000 pesos.
Sa sitwasyon naman nga magresulta ini sa kamatayon, multahan ang violator sang P300,000 tubtob 500,000.
Ginpasiguro naman ni Geduspan nga accurate ang alcohol breath analyzer nga ila gamiton bangud calibrated ini sa Central Office.
Nagalaum naman ang ahensya nga paagi sini nga paandam, mas matahap nga magmaneho nga nakainom ang mga drivers agud malikawan ang ano man nga aksidente.
