Nakabalik na gid man sa Pilipinas nga hilway sa katalagman ang 17 ka Pinoy crew members sang MV Galaxy Leader nga amo ang barko nga gin-hijack sa Red Sea sadtong Nobyembre 2023.
Lakip sa ila amo ang isa ka Ilonggo nga si Leonardo Junjun Flores sang Barangay Pagsangaan, Pavia, Iloilo.
Suno sa Department of Migrant Workers, naghugpa ang eroplano sakay ang seafarers sa Ninoy Aquino International Airport Terminal 1 via Oman Air Flight No. 843 sang 9:31 kagab-i, Enero 23.
Lakip sa nag-abi-abi sa ila pag-abot amo ang ila pamilya, sanday Migrant Workers Secretary Hans Leo Cacdac, Foreign Affairs Secretary Enrique Manalo, Transportation Secretary Jaime Bautista, kag iban pa nga government officials.
Suno kay Cacdac, tugutan anay ang crew members nga makatinir kaupod sa ila pamilya sa sulod sang pila ka adlaw, magpaidalom sa tests, kag siguruhon gid nga maayo ang kondisyon sang ila nga lawas.
Suno naman sa Overseas Workers Welfare Administration (OWWA), may ihatag nga financial aid, counseling kag stress debriefing halin sa ahensya para sa tanan nga seafarers. Iga-monitor man sila sa ila nga recovery period kag kun handa na nga magbalik sa programa, maka-avail sila sa nagkalain-lain nga programa nga ginatanyag sang ahensya.
Nahibaluan nga 428 ka adlaw nga gin-hostage ini nga mga Pinoy. Lakip sila sa crew members sang Israeli-owned MV Galaxy Leader nga ginbanggaan sang Houthi rebels sa Red Sea kag gindala sa Yemen sadtong Nobyembre 2023 nga isa ka bulan gid lamang matapos nag-ibwal ang giyera sa Gaza.
Base sa report sang Al Masirah TV nga ginapanag-iyahan sang Houthis, ang ila paghilway sa mga seafarers ang kasunod sang ila “koordinasyon” nga ginhimo kaangot sa ceasefire sa Gaza war sa tunga sang Israel kag Hamas.
