ILOILO CITY – Mainit nga gin-abi-abi sang mga tumuluo nga Katoliko kag pamunuan sang Archdiocese of Jaro ang anunsyo sang Vatican nga gin-appoint ni Pope Francis si Cebu Auxiliary Bishop Midyphil Billones bilang masunod nga Jaro Archbishop.
Nabatian ang paghinugyaw kag pagpinalakpak sang mga tawo sa Jaro Metropolitan Cathedral sang ginkumpirma ini sang simbahan kadungan sang alas singko sa hapon nga Solemn Pontifical Mass nga ginpangunahan ni Manila Archbishop Jose Fuerte Cardinal Advincula, Pebrero 2.
Yara man sa amo nga misa si Billones kag nakit-an nga ginhakos sini ang arsobispo sang Manila nga kaangay sa iya tumandok man sang Capiz.
Sa interview sang Bombo Radyo kay Reverend Father Angelo Colada, director sang Archdiocese of Jaro Social Communication Office, iya ginpahayag nga sorpresa ang anunsyo para sa mga tawo kag mga kaparian sa Iloilo.
Ginlaragway sini si Billones bilang malapit ukon suod sa mga tawo, may amaynon nga pagtatap, kag may kinaiya sa pagpamati kag paghangop. Kilala man ini sa iya makatalandog-balatyagon nga mga laygay kag homily kaangay sang iya napabati sa alas otso sa aga nga Solemn Pontifical Mass sa main altar sang katedral kadungan sang pista ni Nuestra Señora dela Candelaria.
Wala pa sang pinal nga petsa kun san-o pormal nga magapungko si Billones bilang bag-o nga arsobispo. Suno kay Colada, posible nga maistoryahan nila ang installment buwas kadungan sang liwat nga pagkitaay sang mga kaparian.
Ginpasalamatan man ni Colada si Archbishop Most Reverend Jose Romeo Lazo, D.D. nga halos pito ka tuig nga nagpangalagad sa arsobispo.
Base sa report sang Catholic Bishop’s Conference of the Philippines, ginbaton ni Pope Francis ang resignation ni Archbishop Lazo. Naga-edad na ini subong sang 76 nga lapaw na sa mandatory retirement age sang 75.
SIN-O SI ARCHBISHOP-DESIGNATE DODONG BILLONES?
Si Billones nga naga-edad 55-anyos amo na ang mangin ika-14 nga archbishop sang Jaro nga nagasakop sa syudad kag probinsya sang Iloilo amo man sa probinsya sang Guimaras.
Nabun-ag siya sa Panay, Capiz.
Nagtuon siya sang Philosophy sa St. Vincent Ferrer Seminary sa Iloilo City kag Theology sa Loyola School of Theology sa Quezon City kun sa diin nakuha sini ang master’s degree sa amo man nga program.
Na-ordenahan siya bilang pari sa Archdiocese of Jaro sang Oktubre 2, 1995 ukon halos tatlo ka dekada na ang nagligad.
Lain-lain man nga posisyon ang gintungdan sini sa simbahan lakip na ang pagpungko bilang personal secretary kanday Archbishop Alberto Piamonte kag Archbishop Angel Lagdameo.
Sang 2011, naangkon sini ang Doctorate in Theology halin sa Pontifical Gregorian University sa Roma.
Sang Hulyo 2019, nagaserbe pa sadto si Billones bilang rector sang St. Joseph Regional Seminary of Jaro sang gin-appoint siya sang Santo Papa bilang auxiliary bishop sang Cebu.
Na-ordenahan siya sa episcopate sang Agusto 27, 2019 diri man sa Jaro Cathedral.
