Gindeklarar na ni Agriculture Secretary Francisco Tiu Laurel Jr. ang food security emergency agud nga masolusyunan ang padayon kag indi kinaandan nga pagsaka sa presyo sang bugas sa mga merkado.
Sa idalom sang Department Circular No. 03, ginatugutan na ang pag-release sang stocks nga yara sa National Food Authority (NFA) agud nga ma-stabilize ang presyo kag masiguro nga masarangan kag accessible para sa mga Pinoy ang bugas.
Base pa sa issuance sang ahensya, magapabilin ang food security emergency magluwas lamang kun i-withdraw na ukon bawion na ini sang secretary.
Iga-subject man ini sa pagrepaso sa kada apat ka bulan.
Ginhimo sang Department of Agriculture (DA) ang deklarasyon bangud naga-sige sa gihapon sa pagsaka ang presyo bisan pa nga may pagnubo na sa global prices kag bisan pa nga ginbuhinan na ang taripa sa imported nga bugas sang Hulyo 2024. Halin sa 35 percent, ginpanubo sa 15 percent ang tariff rates sa bugas sang amo nga bulan.
Ginbasehan man sang National Price Coordinating Council (NPCC) ang data sa Philippine Statistics Authority (PSA) kun sa diin naglab-ot ang rice inflation sa 17.9 percent sang September 2023. Lapaw ini sa upper band sang target sang gobyerno nga 4 percent para sa food inflation.#
