Gin-file na sang National Bureau of Investigation (NBI) kag Philippine National Police (PNP) ang mga kaso nga murder kag attempted murder batok sa mga nagpatay kay former Iloilo City Police Office (ICPO) Director kag anay Philippine Charity Sweepstakes Office (PCSO) Board Secretary Atty. Wesley Barayuga sang 2020.
Lakip sa mga ginpasakaan sang kaso amo sanday former PCSO general manager Royina Garma, former National Police Commission (NAPOLCOM) Commissioner Edilberto Leonardo, Lt. Col. Santie Mendoza, Police Senior Master Sergeant Jeremy Causapin, ang ginpahalin sa pagkapulis nga si Nelson Mariano, isa ka alyas `Loloy’, kag isa pa ka wala nakilala nga suspek.
Matandaan nga liwat nga ginbuksan ang kaso matapos nabulgar sa testimoniya ni Mendoza sa imbestigasyon sang House Quad Committee ang pag-ambush sang Hulyo 30, 2020 nga nagresulta sa kamatayon ni Barayuga sa Mandaluyong City.
Diri kag ginpangalanan ni Mendoza sanday Garma kag Leonardo na utok sa pag-ambush kay Barayuga.
Ginrekomenda man ang NBI kag CIDG nga himuon nga state witnesses sanday Mendoza kag Mariano bangud sa ila pag-ako.
Ginatugyan naman sang mga ahenya sa Deparment of Justice (DOJ) ang masunod nga mga tikang kaangot sa kaso ni Barayuga.
