Gin-ulan sang pagpakamalaot ang pahayag ni United States president Donald Trump nga iga-take over sang Estados Unidos ang Gaza kag magtukod sang “Riviera of the Middle East”.
“The US will take over the Gaza Strip and we will do a job with it too,” kabahin sang pahayag sang American leader sa joint press conference kaupod kay Israeli counterpart Benjamin Netanyahu.
“We’ll own it and be responsible for dismantling all of the dangerous unexploded bombs and other weapons on the site, level the site and get rid of the destroyed buildings,” dugang sang presidente.
Ang international powers kaangay sang Russia, China, kag Germany ang nagsiling nga magadala ini sang panibag-o nga pag-antos kag kaakig sa mga Palestinians.
Madasig man nga ginbasura sang Saudi Arabia ang amo nga plano kag gintawag man ang ila kaugalingon nga panindugan nga klaro kag indi na negotiable.
Para naman sa France, ginsulit sini ang pagpamatok sa pagpatal-as sa mga Palestinians sa Gaza bangud isa ini ka seryoso nga paglapas sa international law kag nagapaluya man sang relasyon sa close partners ang pungsod nga amo ang Egypt kag Jordan.
Para naman sa Spain, Gazan Palestinians ang nagapanag-iya sang Gaza gani dira ang tanan nga rason nga magapabilin sila sa Gaza.
Nagpaguwa man sang statement ang United Kingdom nga dapat tugutan na ang Palestinians nga makatukod liwat sang ila nga balay bangud nagakabagay sa ila nga mahatagan sang buwasdamlag sa duta nga ila gintawhan.
Para naman kay Brazil President Luiz Inacio Lula da Silva, wala sang pulos ang proposal ni Trump kag indi mahangpan sang bisan sin-o nga tawo.
Sa Australia naman, nagsiling si Prime Minister Anthony Albanese nga ginasuportahan sang ila pungsod ang two-state solution kun sa diin nakasaad nga pwede makapuyo sang malinong an Israelis kag Palestinians.
Ginsiling sang pungsod nga nag-suporta sila sa ceasefire, paghilway sa hostages, kag paghatag sang ayuada sa mga tawo sa Gaza.
Matandaan nga sini lang nga Enero nakabalik ang mga Palestinian sa Gaza matapos ang ceasefire sang Israel kag Hamas militants. Nag-umpisa ang ila masingki nga giyera sadtong Oktubre 2023 nga nagbilin sang masobra 40,000 nga patay sa Palestinian territory.#
