Ginkumpirma sang kapulisan nga may unod nga iligal nga droga ang isa ka pouch bag nga gin-turnover sang isa ka concerned citizen sa Barangay Compania, Molo, Iloilo City.
Sa interview sang Bombo Radyo kay Police Captain Ryan Christ Inot, hepe sang Molo Police Station, iya ginpahayag nga naglab-ot sa 16 sachets ang nakuha sa bag, may bug-at nga 80 gramos kag may standard drug price nga P544,000.
Ang nagpahibalo sa pulis amo ang kagawad sang amo nga barangay.
Suno kay Inot, indi ini una nga bes nga natabo ang kaso nga ini bangud sang nagligad, may yara man nga duha ka reports nga may nakit an nga bag nga may unod nga marijuana.
Dugang ni Inot, daw ginatuyo ini nga hulugon sa area bangud madulom ang amo nga lugar kag posible ginahimo nga meeting place sang mga durugista.
Sa karon, padayon pa ang imbestigasyon sang Molo Police Station kun sin-o ang may kahimuan sini kag kun may kaangot pa nga mga kaso.#
(Article: Bombo Hanna Joy Mendoza Andasa)
