Ginkumpirma sang Office of Civil Defense (OCD) nga nagpadala ang Pilipinas sang humanitarian aid sa Gaza.
Ang nagpanguna sa turnover sang ayuda amo si Civil Defense Administrator Ariel Nepomuceno. Ginalakipan ini sang 8,323 bonnets, 3,187 ka pares sang gloves, kag 20 ka mga habol kag gintugyan na sa Jordanian Consulate.
Ini nga donasyon sang Pilipinas ang kabahin sang suporta sa Humanitarian Air Bridge Campaign sang Jordan.
Suno kay Nepomuceno, nagalaum sila nga ilugon man ini sang iban nga mga ahensya sang gobyerno para nga mabuligan ang mga nagakinahanglan indi lang sa Pilipinas kundi sa luwas sang pungsod.
“We stand in solidarity with all those impacted by this tragedy and recognize the urgency of the situation,” kabahin sang statement sang OCD official. “We are hopeful that today’s ceremony will not only celebrate the successful partnership we have forged but also inspire other Philippine agencies to join future rounds of this important campaign. Together, we can continue to make a meaningful impact on the lives of those in need, both here and abroad.”
Matandaan nga masobra tunga sa milyon nga mga tawo ang nagbalik sa north Gaza halin sang natabo ang ceasefire sa tunga sang Israel kag Hamas militants sang Enero 2025.
First phase pa lamang ini sang agreement kun sa diin ginpanghilway ang pila sa mga bihag nga 15 ka bulan man nga nadingutan sang kahilwayan matapos gindala sang militante nga grupo sa Gaza Strip.
Oktubre 2023 sang nag-umpisa ang amo nga giyera sa Middle East kun sa diin may apat ka mga Pinoy nga napatay.
