Gintumod sang Department of Education Region 6 ang rason kun ngaa may yara pa sang malapit 300 ka mga unfilled nga posisyon sa pagka- principal sa Western Visayas.
Sa interview sang Bombo Radyo kay Mr. Hernani Escullar Jr., spokesperson sang Department of Education Region 6, iya ginpahayag nga madamo man ang qualified para sa posisyon base sa requirements sang Civil Service Commission, apang indi passers ang mga ini sang National Qualifying Exam for School Heads.
Suno kay Escullar, sa 21 ka mga schools division, may vacant positions gid para sa mga school principals.
Pahayag niya, sa subong, may yara lang sang nagaserbe nga officer in charge nga temporaryo nga ginatungdan ang papel sang principal.
Padayon naman nga gina-engganyo sang ahensya ang mga manunudlo nga qualified para sa posisyon nga mag-apply kag magkuha sang National Qualifying Exam for School Heads agud mapun-an ang kakulang sang principals sa bilog nga rehiyon.
