𝗜𝗟𝗢𝗜𝗟𝗢 – Tatlo ka beses na nga nagreklamo sa Provincial Government Environment and Natural Resources Office (PGENRO) ang isa ka residente nga naga-claim nga tag-iya ini sang duta kun sa diin ginapatuman ang quarry sa Tigum River, Brgy. Salacay, Cabatuan, Iloilo.
Sa interview sang Bombo Radyo kay Atty. Cesar Emmanuelle Buyco, Jr., pinuno sang PGENRO, iya ginpahayag nga sang tuig 2022, duha ka beses nga nagareklamo sa ila si Maria Fe Cabucos nga amo ang naga-claim nga siya ang tag-iya sang duta.
Matapos sini, sang 2024, nagreklamo man ini pinaagi sa Mines and Geosciences Bureau (MGB).
Suno kay Buyco, masami nga nagakontra si Cabucos sa mga resulta sang ila imbestigasyon sa diin gina-akusaran pa sila nga naga-apin sa alkalde.
Ginpahayag sini nga natukiban nila nga ang ginareklamo ni Cabucos nga iya duta ang kabahin na sang suba nga nagakahulugan nga isa ka public domain ukon ginapanag-iyahan na sang gobyerno.
Masami man suno sa natungdan nga ginabuyayaw sila ni Cabucos nga kaangay man sang ginhimo sini sa iya Facebook live sa diin ginbuyayaw sini si Cabatuan, Iloilo Vice Mayor Ronilo Caspe.
