Gin-report sang Hamas nga napatay ang tatlo ka mga pulis nga lunsay Palestinians kasunod sang airstrike sang Israel sa Rafah sa southern Gaza.
Suno sa Interior Ministry sang militant group, naka-deploy ang tatlo sa area para nga mabantayan ang mga truck nga nagapasulod sang ayuda sa teritoryo sang Palestine.
Gintawag ini sang grupo nga paglapas sa ila nakasugtan nga ceasefire nga nag-umpisa sang Enero 19.
Suno pa sa Palestinian officials, nag-violate man ang Israel sa kasugtanan sang ginbalabagan sini nga makasulod ang equipment nga ginpadala agud manglimpyo sang mga balay sang mga tawo sa Gaza.
Gin-alegar man nga ginpunggan man ang mga pasyente nga makabiya agud nga magpabulong kuntani sa Egypt.
“The ministry … condemns this crime and calls upon the mediators and the international community to compel the occupation to stop targeting the police force, which is a civil apparatus,” suno sa Hamas.
Sa statement sang Israeli military, ginpaathag nila nga gina-target nila ang armado nga mga indibidwal nga nagapalapit sa Israeli forces nga naka-deploy malapit sa Gaza. Nagpanawagan man ini sa mga residente sa Gaza nga magsunod sa instructions sang military kag indi magpalapit sa Israeli troops sa area.
Matandaan nga sang weekend, may tatlo ka dugang nga mga bihag nga ginhilway ang Hamas. Bilang kabaylo, nagpaguwa man ang Israel sang 369 ka mga preso nga Palestinians kag detainees.
Ini na ang pang-anum nga hostage-prisoner swap sang Hamas kag Israel sa idalom sang una nga hugnat sang ceasefire agreement.
Sa subong, 19 na ka mga Israelis kag lima ka Thai hostages ang nabuy-an sang Hamas kag 73 pa ang nabilin sa Gaza, apang sa sini nga numero, ginapatihan sang Israeli military nga patay na ang katunga.
