𝗢𝗧𝗢𝗡, 𝗜𝗟𝗢𝗜𝗟𝗢 – Wala sang nakita ang kapulisan nga patimaan sang foul play sa kamatayon sang lalaki nga nasapwan sa kilid sang baybay sang Poblacion East, Oton, Iloilo.
Ang biktima amo si Marcelino Todorejos Sr., 59, kasado, residente sang Barangay Poblacion South, Oton, Iloilo kag nagatrabaho bilang laborer.
Sa interview sang Bombo Radyo kay Patrolman Fritz Desbaro, imbestigador sang Oton Municipal Police Station, iya ginpahayag nga santo sa ila pagpangusisa, nakita sang isa ka manugpangisda ang biktima nga wala na sang kabuhi.
Suno kay Desbaro, gintuad mismo sang misis sang biktima nga masami ini nga naga-inom.
Antes ini nasapwan nga patay, naglesensya pa ang biktima sa iya misis nga matsikyar sang iya trisikad, apang wala na ini makapauli.
Possible suno sa natungdan nga bangud sa kahulugbon, wala na nakontrol sang biktima ang iya kaugalingon kag nahulog sa seawall.
Ginpahayag sang pulis nga may nakita sila nga pilas sa kamot sang biktima nga tuga sang mga lansang sa lugar.
