𝗜𝗟𝗢𝗜𝗟𝗢 𝗖𝗜𝗧𝗬 – Gin-athag ni Iloilo City Mayor Jerry Treñas nga wala ini nagapamolitika sa iya pagpasugot sa renegotiation sa joint venture agreement para sa lloilo Ferry Terminal sa Parola Wharf sa tion sang Mabilog administration.
Ang kasugtanan nga ginpirmahan sang 2012 nanday former Iloilo City Mayor Jed Patrick Mabilog on behalf sa Iloilo City Government kag Ferdinand Sia, nga nagtiglawas sa duha ka korporasyon nga Double Dragon Properties Corporation (DDPC) kag corporation sa Parola.
Sa interview sang Bombo Radyo kay Treñas, iya ginpahayag nga siya ang nagpangabudlay agud makuha ang duta sa Philippine Coast Guard sa Parola Wharf sa tion sang iya termino.
Suno kay Treñas, maathag nga ‘grossly disadvantageous’ sa bahin sang Iloilo City Government ang nasambit nga kasugtanan sang ini ang ginpirmahan sang 2012, apang wala na ini mahimo sadto bangud natapos na ang iya termino.
Nahibaluan nga nagpungko si Treñas bilang Representative sa Lone District sang Iloilo City sang 2010 kag nagbulos sa iya si Mabilog.
Isa sa mga nagapanguna nga concern sa nasambit nga isyu amo ang revenue share sang syudad sa terminal nga yara lang sa one percent sa gross terminal income ukon P200,868 kada tuig sa sulod sang 25 ka tuig.
Ginalantaw naman nga dehado diri ang syudad nga amo ang nagapanag-iya sang 10,687-square-meter nga duta sa diin nahamtang ang terminal.
Ang balor sang duta sang syudad ang nagtaas na halin sa P51.65 million sang 2012 kag nangin P183.35 million sang 2024, samtang ang commercial building nga gintukod sa terminal ang nagabalor sang P105.66 million.
Ginsaway man sang syudad ang pagpatuman sang kasugtanan sa rason nga kulang ini sa transparency sa diin wala nalakip sa proposal sang korporasyon ang pagtukod sang commercial buildings kag wala man sang master development plan nga requirement sa idalom sang joint venture agreement.
Natukiban man nga wala nagapasa ang korporasyon sang annual reports sa project operations, nga requirement man sa kasugtanan.
Kaangot sini, nagdepensa naman si Mabilog nga ang 2012 joint venture agreement ang makabenepisyo sa syudad sang amo nga tuig sa diin indi pa ini makabig nga ‘booming economic hub’, bagay nga ginkwestyon ni Treñas.
Gin-athag man sang anay alkalde nga wala naggasto ang syudad sang bisan isa ka sentimo ukon nag-loan para sa nasambit nga proyekto.
-𝗪𝗶𝘁𝗵 𝗮 𝗿𝗲𝗽𝗼𝗿𝘁 𝗳𝗿𝗼𝗺 𝗕𝗼𝗺𝗯𝗼 𝗔𝗻𝗴𝗲𝗹 𝗧𝗮𝗻
