Nagpangabay ang Iloilo Provincial Health Office (IPHO) sa mga Ilonggos nga labi pa nga mas mangin aktibo sa pagbato sa dengue bangud sa padayon nga pagtaas sang kaso sang balatian kun sa diin tanan nga banwa kag syudad sa probinsya ang may kaso na sini.
Sa latest data, kabug-usan nga 592 ka mga kaso sang dengue ang narekord sa Iloilo humalin sang Enero 1, 2025 tubtob Pebrero 15, 2025.
Sa nasambit nga numero, lima na ang patay.
Sang 2024, yara lang sa 335 ang kaso sang dengue nga narekord sa amo man nga period sa diin 77% ang pagtaas subong nga 2025.
Sa interview sang Bombo Radyo kay Dr. Rodney Labis, head sang Health Delivery Service Division sang amo nga opisina, iya ginpahayag nga agud mapasanyog ang kampanya kontra dengue, hatagan ang mga rural health units sang funding para sa dengue test kits, mga bulong, public awareness campaigns, kag mosquito control measures pareho sang indoor residual spraying kag fogging.
Ginaengganyo man ang mga barangay officials nga magpartisipar sa Kontra Dengue initiative sang probinsya.
Ginahingyo man sa mga tawo nga magpadulong gilayon sa opsital para sa atensyon medikal kun makabatyag sang sintomas sang dengue kaangay sang mataas nga hilanat, sakit sang ulo, muscle kag joint pain, eye pain, nausea, pagpalanuka, rashes kag dehydration.
