Nagpanawagan sanday Cardinal Pablo Virgilio David kag Manila Archbishop Cardinal Jose Advincula sa mga tumuluo nga ipangamuyo ang pag-ayo ni Pope Francis nga yara subong sa ospital bangud sa double pneumonia.
Suno kay Cardinal David nga amo ang Caloocan diocese bishop kag president sang Catholic Bishops’ Conference of the Philippines (CBCP), dapat nga updan ang pagpangamuyo sa pag-recover sang Santo Papa sa sini nga mabudlay nga mga tinion. Ginsulit man sini ang anunsyo sang Vatican nga ginkanselar anay ang mga hilikuton sang 88-anyos nga Santo Papa bangud sa ginasuprer sini nga complex respiratory infection.
“May I ask for your prayers for his healing and recovery during this challenging time,” pahayag sang Cardinal. “Despite his condition, doctors say he remains in good spirits and has expressed gratitude for the prayers he has received. The Vatican has canceled all of his engagements as he battles this complex respiratory infection.”
Sa bahin ni Cardinal Advincula, ginpalab-ot sini ang apelar ni Apostolic Nuncio to the Philippines, Archbishop Charles John Brown, nga magpangamuyo para sa Pope. Ginhingyo man sini ang mga parokya kag komunidad nga mag-organisar sang Holy Hour for the healing of the sick.
“Let us likewise offer our personal and family prayers for this intention,” dugang sini.
Nahibaluan nga wala pa sang kasiguruhan kun san-o makaguwa si Pope Francis sa Gemelli Hospital sa Roma sa Italya kun sa diin gindala siya sang Pebrero 14.
Ang double pneumonia nga diagnosis nagakahulugan nga apektado ang iya duha ka mga baga.Ang mga sintomas sini nga balatian nagalakip sang pag-ubo, kabudlay sa pagginhawa, pagpalangapoy, kag pagpalanakit sang lawas.
Nagpaguwa sang update ang Holy See Press Office Mierkules sang gab-i oras sa Roma kag pasado alas tres sa kaagahon naman oras diri sa Pilipinas nga may gamay nga improvement sa blood tests sang Santo Papa ilabi na sa inflammatory markers.
Estable man ang kondisyon sini, kag nag-trabaho pa kaupod sa iya pinakasuod nga collaborators. Sa hapon, ginbisita man ini sang punong ministro sang Italya kag nag-istoryahanay sa sulod sang 20 minutos.
Nahibaluan nga ang Pope, nga lider sang Roman Catholic Church nga may 1.4-billion nga mga miyembro sa kalibutan, ang nagabatyag sang trangkaso kag iban pa nga health problems sang pila ka beses na sa nagligad nga duha ka tuig. Sang 2021, na-ospital man ini bangud sa colon surgery.#
