ILOILO CITY – Tuman ka malipayon ang mga alumni sang Iloilo Science and Technology University matapos nangin topnotchers sa February 2025 Mechanical Engineers Licensure Examination.
Ini amo sanday Engr. Ivan Joey Gadot nga rank 2 nga may 92.15% nga rating kag Francis Vonn Jesura nga Rank 6 nga may 89.80% nga rating.
Sa interview sang Bombo Radyo kay Gadot sang Gaban, San Lorenzo, Guimaras, iya ginakabig nga bonus na sa iya pagkapasar ang mangin topnotcher.
Suno kay Gadot, Aerospace engineering ang iya una nga choice, apang bangud wala sang kaangay nga kurso sa Iloilo, ginpili sini nga magkuha sang Mechanical engineering.
Sa ulihi, natun-an man sini nga palanggaon ang iya kurso sa diin nangin matam-is man ang bunga sang iya pagtinguha.
Kaangay naman ni Gadot, Aerospace engineering man ang first choice ni Jesura.
Sa interview sang Bombo Radyo kay Jesura sang Magamay, Nueva Valencia, Guimaras, iya gin-ako nga nakulbaan ini sang nagkuha sang pasinawan, apang amo na ang iya pagpasalamat sa Diyos nga nag-topnotcher pa ini.
Gin-ako man sini nga dako nga pagpanghangkat sa pagtuon ang pagbalanse sang academics kag extra-curricular activities.
Ginpabugal man sini nga duha sila sang iya girlfriend nga nakapasar sa pasinawan.
Ginpakigbahin sini nga nakabulig ang iya girlfriend sa ila pagtuon.
Suno naman kay Eden Lee Sogo-an, sang Magbato, Lambunao, Iloilo, ginakabig sini nga dako nga blessing nga makapasar sa pasinawan.
Nalipay man ini bangud nga nadala bilang topnotcher ang iya boyfriend.
Ginpahayag sini nga ginpamatud-an nila nga indi upang ang lovelife sa pagtuon.
May mga kahigayunan man suno sa natungdan nga nabudlayan siya sa pagtuon, apang bangud sa bulig ni Jesura, nangin mapag-on ini.
