Ginbasol sang Malacañang ang Duterte administration kun ngaa nalakip anay ang Pilipinas sa gray list sang Financial Action Task Force (FATF).
Kadungan sini nga statement, nagpasalig ang palasyo nga magapadayon ang administrasyon ni President Bongbong Marcos sa pagpanglimpyo sa lapta nga ginbilin ni anay President Rodrigo Duterte.
Sa statement ni Presidential Communications Office (PCO) Undersecretary Claire Castro, ginsiling sini nga nalakip anay sa lista ang Pilipinas sang 2021 sa idalom sang liderato ni Duterte.
Suno sa iya, kulang ang regulatory supervision sang gambling operations kag nagdamo man ang Philippine offshore gaming operators. Maluya man suno kay Castro ang implementasyon sang targeted financial sanctions ilabi na sang pandemya kun sa diin may mga report sang anomaliya sa transaksyon. Dugang niya, atrasado ang implementasyon sang Anti-Terrorism Act of 2020 bisan daku ang ginpain nga intelligence kag confidential funds.
Ginpasalig ni Castro nga magapadayon ini nga administrasyon sa pagtapna sa mga aktibidad nga naangot sa money laundering kag pagpondo para sa mga terorista.
“Dahil sa pagpupursige ng ating Pangulo ay napatanggal na po natin ang ating bansa sa Financial Action Task Force grey list,” suno sa opisyal. “Hindi titigil ang ating Pangulo na maisaayos at mapigil ang mga gawaing may kinalaman sa money laundering at terrorist financing.”
Sang nagligad nga semana sang ginkumpirma nga nakakas na ang pangalan sang Pilipinas sa sini nga lista sang FATF.
Nahibaluan nga ang black list sa sini nga dirty money watchdog ang nagalakip sang mga pungsod nga may seryoso nga kakulangan sa pagtapna sa money laundering, terrorist financing kag financing of proliferation.
Sa nauna nga statement sang Bangko Sentral ng Pilipinas (BSP), ginsiling nga nakalampuwas ang Pilipinas sa gray list bangud sa maayo nga kooperasyon sa tunga sang gobyerno kag pribado nga sektor.
