Mainit nga gin-abi-abi si Ukrainian President Volodymyr Zelenskyy sang nag-abot ini sa Britanya, baliskad sa iya naagyan sang nagbisita ini sa Estados Unidos sang Amerika.
Madamo nga tawo ang nagtipon kag naghugyaw sang nag-abot na si Zelensky sa 10 Downing St. sa London kun sa diin nagahulat si British Prime Minister Keir Starmer nga naghakos sa iya.
Ginpasalig sini kay Zelensky nga bug-os ang suporta sang Britanya sa Ukraine kag magatindog ini kaupod ang amo nga pungsod tubtub sa katubtuban.
Gin-anunsyo man sini nga magahatag ang Britanya sang $2.84 billion ukon P164.55-billion nga loan sa Ukraine para sa military procurement agud nga mas magbaskog ang ila pwersa batok sa Russia.
Ini nga kuwarta ang halin sa profits nga nakuha sa ginpang-freeze nga Russian assets.
Nagpanawagan man si Starmer sa mga counterparts sini sa Europa nga suportahan ang Ukraine.
Gin-address sini ang panawagan sa 18 ka mga kaangay niya nga lider duha ka adlaw matapos nagbaisay sanday Zelensky kag US President Donald Trump sa White House bangud sa isyu sang Ukraine-Russia war.
