ILOILO CITY – Ginkumpirma sang kapulisan nga ginagamit mismo sang nadakpan nga regional top-listed drug personality sa Western Visayas ang salakyan sang isa ka security agency agud mag-deliver sang iligal nga droga.
Ang drug buy-bust operation ang ginpatuman sa Barangay Calumpang, Molo, Iloilo City.
Ang mga subject amo sanday Alias “Ariane”, 48-anyos, residente sang Zone 2, Barangay Bakhaw, Mandurriao, Iloilo City.
Nadakpan man ang nagaserbe sini security guard nga si Alias “Toto”, 32-anyos, residente sang Barangay Dacuton, Dumarao, Capiz.
Sa interview sang Bombo Radyo kay Police Captain Ryan Christ Inot, Head sang City Drug Enforcement Unit (CDEU), iya ginpahayag nga apat ka mga security guards ang nagabantay kay Alias “Ariane”, apang si Alias “Toto” lang ang ila nadakpan sang ginpatigayon ang operasyon.
Suno kay Inot, may ideya mismo si Alias “Toto” nga involve sa iligal nga droga si Alias “Ariane” sa diin lunsay ang mga ini may record sa pagduso sang iligal nga droga ilabi na sa Bakhaw, Mandurriao, Iloilo City.
Sa subong, ginahulat na lang ang resulta sang drug test sang duha agud mapasakaan ang mga ini sang kaso nga paglapas sa Republic Act No. 9165 ukon Comprehensive Dangerous Drugs Act of 2002.
