Ginapa-ilisan na sang central office sang Bureau of Fire Protection (BFP) ang mga firetrucks nga naga-edad sang 30 ka tuig pataas.
Sa interview sang Bombo Radyo kay Fire Senior Inspector Michael Lopez, Acting chief, Logistic Division sang BFP Region 6, iya ginpahayag nga nagmando na ang ila central office nga indi na pag-ipakayo ang mga daan nga mga firetrucks sa baylo, magbakal na lang sang bag-o.
Kun isa-isahon, yari ang status sang mga firetrucks sa rehiyon:
Negros Occidental – may 94 ka firetrucks kag 11 ang unserviceable;
Aklan – may 24 ka firetrucks kag 6 ang unserviceable;
Iloilo – may 97 ka firetrucks kag 14 ang unserviceable;
Antique – may 28 ka firetrucks kag 4 ang unserviceable;
Capiz – may 29 ka firetrucks kag 1 ang unserviceable;
Guimaras – may 7 ka firetrucks kag 1 ang unserviceable;
Suno kay Lopez, sa subong, apisar may mga unserviceable na nga firetrucks, apang bastante man ang mga firetrucks sa kada banwa kag syudad sa rehiyon.
Ginpahayag sini nga santo sa BFP Modernization Program, kada tuig, may ginabakal man nga bag-o nga firetrucks.
Sa subong nga 2025, may tatlo ka mga bag-o nga firetrucks nga ginpain para sa Western Visayas.
-𝗪𝗶𝘁𝗵 𝗮 𝗿𝗲𝗽𝗼𝗿𝘁 𝗳𝗿𝗼𝗺 𝗕𝗼𝗺𝗯𝗼 𝗣𝗵𝗮𝘂𝗹𝗶𝗻𝗲 𝗣𝗶𝗹𝗹𝗼𝗿𝗮
