Ginguba sang Russia ang energy kag gas infrastructure sang Ukraine paagi sa pagpatigayon sang missile attack.
Suno sa Ukrainian air force, 67 missiles kag 194 drones ang ginpalupad sang Moscow sa overnight attack apang natigayon nga ma-sagang ang 34 sa missiles kag 100 sa drones.
Lakip sa nag-report sa halit nga natuga sang atake amo ang regional officials sa northeastern city sang Kharkiv pakadto sa western city sang Ternopil.
Walo ka mga tawo ang nasamaran sa Kharkiv kag duha naman lakip ang isa ka bata sa Poltava.
Nahibaluan nga ginapuntariya sang Russia ang Ukrainian cities kag mga lugar nga malayo sa front lines kada gab-i gamit ang ila nga drones.
Ini nga atake amo ang ila labing-una nga large-scale assault halin sang gin-suspend ni US President Trump ang military aid kag pag-share sang intel subong nga semana kasunod sang pagbaisay nila ni Zelensky sa White House.
Sa pihak sang nagasaka nga tensyon sa tunga nanday Trump kag Zelensky, nagpaguwa sang bag-o nga statement ang American leader nga nagapaandam sa Russia nga dagdagan ini sang bag-o nga sanctions kag mga taripa.
Bangud ginapudpod sang Russian ang Ukraine sa patag-awayan suno kay Trump, ginakonsiderar niya subong ang large scale Banking Sanctions, Sanctions, kag taripa sa Russia tubtub nga may matabo nga ceasefire kag “FINAL SETTLEMENT AGREEMENT ON PEACE”
Gin-address man sini ang Moscow kag Kyiv nga magplastar na sa lamesa kag hambalan ang ceasefire antes pa maulihi ang tanan.#
Photo: Ukrainian Emergency Service via AP
