Nasapwan nga wala na sang kabuhi ang isa ka operator sang sound system sa ginatulogan sini nga elf truck sa Brgy. Agba-o Bingawan, Iloilo.
Ini amo si Alyas Oming, 34, kag residente sang Brgy. Simsiman, Lambunao.
Sa interview sang Bombo Radyo kay Police Liutenant Philip Girao, hepe sang Bingawan Municipal Police Station, iya ginpahayag nga matapos mag set-up ang biktima sang ila mini-sound nga ipasakop kuntani sa battle of mini sound system sa nagahilapit nga fiesta sang nasambit nga barangay, naglisensya ini nga matulog sa ila elf truck.
Kagina sang aga, sang pukawon na ini kuntani sang iya upod agud nga maghimos, nakit-an niya nga wala na sang kabuhi ang biktima kag may pilas sa ulo tuga sang pagkatiro nga rason man sang iya kamatayon.
Suno kay Girao, nakabati sang gahod kagab i ang mga tawo malapit sa diin ang elf truck apang daw lagpok sang atop ang ila lang nabatian bangud tuga man sang pagkagahod sang ginatesting nga sound system.
Dugang ni Girao, narekober ang isa ka slug sang unidentified caliber kag isa sini ka empty shell sa amo nga elf truck.
Sa subong, ginapadalman pa sang Bingawan MPS ang imbestigasyon natuhoy sa kung sin o man ang naghimo sang krimen sa biktima.
(Article: Bombo Hanna Andasa)
