Ginbyahe na padulong sa The Hague, Netherlands si former President Rodrigo Duterte.
Naglupad ang ginasakyan sini nga Gulfstream G550 aircraft(RP-C5219) halin sa Manila kagab-i, kag magahugpa sa Dubai subong nga aga oras sa Pilipinas antes magalupad liwat padulong na sa The Hague, Netherlands.
Si Duterte ang gin-aresto kahapon sa NAIA Terminal 3 paagi sa warrant nga gin- issue sang International Criminal Court (ICC) bangud sa ginaalegar nga crimes against humanity.
Gindakop ang anay presidente matapos naghugpa sa Ninoy Aquino International Airport (NAIA) ang eroplano nga ginasakyan sini halin sa Hong Kong.
Sa eroplano pa lang, ginpahayag na ni Duterte nga mas maayo pa nga mapatay na lang siya sa baylo nga magsungka.
Ginpunggan pa kuntani ni Honeylet Avanceña ang iya bana nga mag-upod sa International Police kag sa Philippine National Police.
Sa Instagram live video sang bata ni Duterte nga si Kitty, mabatian nga naghambal si Honeylet nga abusado ang mga nagapamalabag sa ila kag wala sang arrest warrant nga ginhatag.
Makit-an man sa video nga ginapakalma sang anay presidente ang iya asawa kag ginpanugyanan nga magsunod nalang sa mga otoridad.
Mangin si Kitty kag ang iya magulang nga si Davao City Mayor Baste Duterte ang nagpakamalaot man sa ginhimo nga pag-aresto sa ila amay nga suno sa iya masakiton na.
Kahapon, ginbasahan sang pinuno sang Criminal Investigation and Detection Group (CIDG) nga si Brigadier General Nicolas D. Torre III sang Miranda rights si Duterte.
Diri kag ginkwestyon ni Duterte kun ano ang basehan sa pag-aresto sa iya.
Ginsabat naman ini ni Torre nga ang kaso ni Duterte ang may kaangtanan sa crime against humanity bangud sa war on drugs sa tion sang iya administrasyon.
